ایراندا تۆرکمن هالیچیلیق صونغاتی‌نینگ آتاسی بولان اوستاد نیازمحمد محمدنیازی، دوشنبه گۆنی، اسفند آیی‌نینگ ۲۳-نجی گۆنی اؤیلأن، وفاتی‌نینگ ایلکینجی ییل دؤنۆمینده، گنبدکاووس شهرینده اؤز اؤیۆنده یاتلانیار.

نیازمحمد یا نیازجان‌آغا، ایراندا تۆرکمن هالیسینی تاناتماق، ناغیشلارینی درنگه‌مک، دوقوو ایشینی مدرنلشدیرمک و عمومان اؤنومچیلیگینگ هیلینی یوقارلاندیرماق اۆچین ایرگینسیز تاغاللا ادن جان‌کؤیرلرینگ بیریدی و شو سبأپلی-ده «تۆرکمن هالیسی‌نینگ آتاسی» آدینا میناسیب بولوپدی. وفاتی‌نینگ بیرینجی ییل‌دؤنۆمینده، اول اوستادی یادلاپ، ترجیمه حالینا بیر گؤز آیلاماغی یرلیکلی بیلیأرس.

نیازجان آغا، کۆمۆش‌دپه شهرینده، ارازمحمد آدلی بیر سوداگأرینگ ماشغالاسیندا ۱۳۰۳-نجی ییلدا دونیأ گلیأر. اول ایلکی مکدبی اؤز دوغدوق دیاریندا اوقاپ، سونگرالار گنبد شهرینه گؤچوپ گلیأر و بازاردا یوپچیلیک و بویاغ ایشی بیلن مشغوللانیار.

اوستاد، ۱۳۵۶-نجی ییلدا تهراندا گچیریلن بیر هالی سرگیسینده تۆرکمن هالیسی‌نینگ بؤلگه اوچین اقتصادی دگرلری‌نینگ بولجاقدیغینی آنقیپ، بو بارادا چینلاقای درنگه‌و ایشینی باشلایار.

نیازجان‌آغا انچمه ییللاپ، تۆرکمن هالی‌سی‌نینگ دۆرلی ناغیشلارینی تاپماق، اولاری سادرانچ کاغیذا چیزماق، دوقمانی کسه قورامادان دیک شکلینه گچیرمک، چؤپ بویانی رواچلاندیرماق و یوقاری هیلده هالی اؤنده‌رمک اۆچین یؤریته شاگیرد یتیشدیرمک اۆچین زحمتلر چکیأر و ایراندا هم داشاری یورتدا گچیریلن ۵۰-دن قووراق هالی سرگیسینه قاتناشیار.

بو ایرگینسیز تاغاللالارینا قایتارغی بولوپ، نیازجان‌آغا «اولکأنگ مۆدیمی مدنیت و صونغات شحصیت‌لاری» هاتاریندا قادیرلانیار. اوستادینگ کشبی بیلن بیر تمبر-ده چاپ ادیلیأر و اونونگ آلیپ باریان ایشلری بارادا «نیازجان و فرش ترکمن» (نیازجان هم تۆرکمن هالیسی) آدی بیلن بیر کتاب، ۱۳۷۱-نجی ییلدا فرهنگان نشریاتی آرقالی نشر ادیلیأر.

اوستاد، تۆرکمن هالیچیلیق صونغاتی بارادا بیر عؤمۆرلیک بارلاغلاری‌نینگ نتیجه‌سینی بیر کتاب قالیبیندا طاییارلایاردی و گلجکده اونونگ چاپ ادیلمگینه اومید بکلأپدی. بو ایش باشا بارمازدان، ۱۳۸۹-نجی ییلینگ نوروزی‌نینگ ۶-نجی گۆنی، ۸۶ یاشلی بو صونغات آرقاداغی سیرقاولیق ضرارلی دنیأدن اؤتیأر و گنبد شهری‌نینگ «جرک صوفی» (آق‌قایا) قونامچیلیغیندا جایلانیار.

منبع: ت.ر.ت تورکمنچه