اؤز یوردوندا غریب / غریبه اولماق


ـ نئچه آی بوندان قاباق خویدا بیر توپلانتیدا من ده 15 ـ 20 دقیقه دانیشدیم، جلسه قورتولدوقدان سونرا نئچه نفر یانیما گلیب دانیشدیغیم قونو حاقّیندا هئچ بیر شئی دئمه‌دن ساده‌جه مندن چوخ گؤزل تورکجه دانیشدیغیم اوچون تشکور ائتدیلر!
ـ اوچ یاشلاریندا بیر قارداشیم قیزی وار، گئچنلرده هرگون گئتدیگی اوشاقلار باغچاسی (مهد کودک) موربّیسی «آللاه ساخلاسین، بو قیز چوخ گؤزل تورکی دانیشیر، ائله آدام دئییر اوتورسون بونون دئدیکلرینه قولاق آسسین» دئمیش!
اؤز یوردوندا غریب اولماق، حتی غریبه (عئیبهجر) اولماق بودور سانیرام؛ بیلنلر بیلیر من تورکجه دانیشدیغیمدا چوخ معمولی دانیشارام، داها دوغروسو آتامدان اؤیرندیگیم دیلی دانیشارام، کلمه لردن داها چوخ، دیلین گرامرینه دیقّت ائیلَرم کی بوزولماسین؛ ایندی گَل گؤر کی ایش ائله یئره گلیب چاتیب کی منیم سینیق ـ سالخاق تورکجه‌مه «چوخ گؤزل تورکجه» دئییرلر. 
ایللر اؤنجه بیریسی باجیما «سنین ده قارداشین تورکچودور» دئمیشدی؛ سببینی سوروشموشدو باجیم، جوابیندا دئمیشدی: «پیامِ نور کیلاسلاریندا عددلری تورکجه دئیَردی سنین قارداشین» :) 
ایلک دفعه ائشیتدیگیمده تعجّوب ائله دیم آمّا سونرا دوشوندوم کی طرف حاقلی ایمیش، آرتیق ساییلاری تورکجه دئیَن قالمادی کی! ماشالله هامی «پیشرفت» ائله ییب، یا تورکجه دانیشماغی مان (عار) بیلیر، یا دا هئچ دوزگون تورکجه دانیشماغی بیلمیر. گئچن آی شهریمیزده بیر توکانا یولوم دوشدو، بیریسی‌نین تلفون نومر‌‌‌ه‌سینی آختاریردیم، توکان صاحابیندان سوروشدوم، نومره‌نی فارسجا دئدی؛ «تورکی دئ قارداش» دئدیم. کندلی بیریسی ایدی، بونا گؤره حتماً منه خاطیر فارسجا دئدی دوشوندوم، هر نه اولسا کندلرده هله قدیم کولتور قالیر ظنّ ائتدیم. آما گل گؤر کی طرف تلفون نومره‌سی نین تورکجه سینی دوزلدیب منه دئیه بیلمه‌دی، من ده باشیمی توولایا توولایا توکاندان چیخدیم!
اؤز یوردوندا غریب / غریبه اولماق بودور سانیرام؛ اینشالله گون گلر بو غریب / غریبه اولانلارین ساییسی چوخالار، آرتیق غریبلیکدن / غریبه‌لیکدن چیخارلار.