توقز کون آریغ رسول آغروب یاتدی

جبرائیل فرمان برله حقدین یتدی

فرشته‌لر بارچه‌سی ماتم توتدی

دنیادین رسول سفر قیلمق اوچون


قایغرور امتی دیب رسول یاتب

فاطمه یغلار ایردی باشین توتیب

عزرائیل کلدی فرمان برله حقدین یتب

شریف تندین عزیز جاننی آلمق اوچون



ملک الموت طشده طوروب قپو قاقدی

فاطمه قپو آچوب قارشو چقدی

سن کیم دیور رسول آنکا قارشو باقدی

قپوغده‌کی کم ایدکن بیلمک اوچون



فاطمه قارشو چقیب سلام قیلدی

عزرائیل هیبت برله علیک آلدی

آریغ رسول ایمان برله مشغول بولدی

همت اوردی آخرتکا بارمق اوچون



رسول آیدی یا عزرائیل قویغل منی

اوغان ایذم جان آلمغه ایذدی سنی

صحابه‌لر یغلاشورلر کورب آنی

اون سکز منک عالم فخری رسول اوچون



رسول آیدی صحابه‌لر بحیل قالنک

آخرتکا اوندادیلر بایق بیلنک

آریغ یونوب مسجد تابا کونده کیلنک

اوزنکزنی جهنمدین یولماق اوچون



عزرائیل پیغمبرننک جانین آلدی

بردین کوکدین فرشته‌لر یغلاب کلدی

عائشه برله فاطمه جزع قیلدی

اون سکز منک عالم فخری رسول اوچون



دوشنبه کون رسول الله سفر قیلدی

خداننک بیورغنه بوین سوندی

ابن عباس سو قویدی علی یودی

اوجماح ایچره حله طونن کیمک اوچون



یردین کوکدین فرشته‌لر یغلب کلدی

آریغ رسول اوزرینه نماز قیلدی

فاطمه بابام تیو جزع قیلدی

پیغمبردین یتیم بولیب قالغان اوچون



فرشته‌لر حلقه اوروبان توردیلر

آریغ رسول جنازه‌سین کوتردیلر

سدرة المنتهی غه تیکوردیلر

عرش کرسی اوزرینه قویماق اوچون



قویمدیلر دینمزنک سلطاننی

عائشه فاطمه آخرت تارخاننی

اسیغ قیلماس اوقوب انجیل قرآنی

آدم اوغلی توغدوقمز اولمک اوچون



اوقدیلر آیت قرآن ربانی‌نی

جنت الماوی تورر رسول اورنی

حقیقت دوست ایدی ویس القرنی

خرقه سن ایذدی آنکا کیمک اوچون



هو هو تیو چقدی تاغدان ایرننگ ایری

سلام قیلدی رسول‌ننگ چهار یاری

آغزین آچدی آیدی کورنک تشم قانی

قموغ تشم صندوردقوم رسول اوچون



قل سلیمان دعا اوچون آیدی مونی

رسول اوچون فدا قیلدی عزیز جانی

کونی کونکا آرتور سن قادر سنی

آخر دمده آریغ ایمان آلماق اوچون

منبع:www.ataturkmen.com