قارامان ولایاتی: تۆرکیهده تۆرکچأنینگ رسمی دیل حؤکمۆنده ایغلان ادیلن ایلکینجی یری
قارامان ولایاتی تۆرکیأنینگ گۆناورتاسیندا یرلهشیأر.
گۆنباتار و دمیرقازیقدان قونیه ولایاتی، گۆناورتادان مرسین ولایاتی، گۆناۇرتا-گۆنباتاردان آنتالیا ولایاتی بیلن قۇنگشی بۇلان قارامان ولایاتی تۆرکیأنینگ ایچینده تۆرک دیلینینگ رسمی دیل ایغلان ادیلن ایلکینجی یریدیر.
تۆرکمن بگلیکلریندن بۇلان قارامان اۇغوللاری بـِگلیگی ،آناتولیداقی تۆرکمن سلچوقلیلاردان سونگ قورالان قارامان مرکزلی بیر بگلیکدیر.
اۇرتاآسیادان آذربایجانا، آذربایجاندان سیواس شأهرینه گؤچِن حوجا سعدالدینینگ اۇغلی نوری صۇفی قاراماناۇغوللارینینگ آتاسیدیر. نوری صۇفی توروس داغلاریندان گچیپ لارِنده آتلی شأهرچهسینده یرلهشِر.
نوری صۇفینینگ اۇغلی کریمالدین قارامان بگ میلادی ۱۳-نجی عاصیردا اۇل یردن کیلیکیا آتلی یره بارار و آناتولی سلجوقلیلاری دؤولتینینگ سولطانی ۱-نجی علاءالدین کیقباد تاراپیندان بؤلگأنینگ بیگی حؤکمۆنده ایغلان ادیلر.
قاراماناۇغوللارینینگ ایکینجی بگی بۇلان کریمالدین قارامانینگ اۇغلی "قاراماناۇغلی محمت بگ" تۆرک دیلینینگ تاریحیندا اینگ اولی آتلاردان بیریدیر.
۱۳-نجی عاصرینگ اورتالاریندا سلچوقلیلارینگ عمومان ادبی دیل حؤکمۆنده پارسچا، دؤولت دیلی حؤکمۆنده ده عاراپچانی اولانیان ماحالیندا قاراماناوغلی محمت بگ میللت بۇلوپ بیلهلیکده یاشاماغینگ ایلکینجی شرطی دیلینگ بیر بۇلماغیدیغینا اینانیاردی.
شۇل واغتدا ادبی و دؤولت دیلی پارسچا- عاراپچا بۇلسا دا حالق تۆرکچه گۆرلهیأردی.
مونی گؤرهن قاراماناۇغلی محمت بگ، توروس داغلاریندا یاشایان بۆتین تۆرکمن طایپالاری بیرلهشدیریپ بیر قـُشون دؤرهدیأر و ۱۲۷۷-نجی ییلینگ مای آیینینگ ۱۳-ونده "شو واغتدان سونگرا هیچ کیم دیواندا، درگاهدا، بارگاهدا و هر یرده تۆرک دیلیندن اؤزگه دیلده گپلهشمهسین" دییپ بیر پرمان بریأر.
قارامان اۇغلی محمت بگینگ بو پرمانی بیلن تاریحدا ایلکینجی گزهک تۆرک-تۆرکمن دیلی، رسمی دیل حؤکمۆنده ایغلان ادیلیأر. موندان اۇزال گؤکتۆرک و اویغور دؤولتلرینده رسمی دیل اویغور تۆرکچهسی بۇلسا دا سلچوقلی تۆرکمنلرینگ پارسچانی رسمی دیل حؤکمۆنده اولانماغیندان سونگ قاراماناۇغلی محمت بگ تۆرکچأنی رسمی دیل ایغلان ادن ایلکینجی حؤکۆمداردیر.
حأضیرکی واغتدا دا قارامان شأهرینده تۆرکمن تیره-طایپالاری اؤزۆنه حاص بیر تۆرکمنچه شیوهسی بیلن گۆرلهشیأر و تۆرکیأنینگ کؤپ یرینده "نگ" حارپی دینگه "ن" حارپینا اۆیتگأن بۇلسادا قارامانداقی حالق حأضیر ده نگ حارپینی اولانیار.
تۆرکیهده شو واغتدا تۆرک-تۆرکمن دیلینینگ قۇرانماغینینگ اینگ اولی سبأبی بۇلسا تۆرکمن آصیللی قاراماناوغلی محمت بگینگ تۆرک دیلینی رسمی ایغلان اتمهگیدیر.
وبلاگ رسمی بنیادمختومقلی فراغی