ماغتیم‌قولی پیراغی آنکارادا اولی دابارا بیلن حاطیرالانار
تۆرکمنلرینگ میللی شاهیری ماغتیم‌قولی پیراغی دینگه تۆرکمن‌صحرا و تۆرکمنیستان دأل، بو ییل تۆرکیه‌ده ده جۇشغونلی بیر یاغدایدا حاطیرالانیار.
قونیه‌دأکی اۇوغانیستانلی طالیپلارینگ توتان ماغتیم‌قولی پیراغی یاتلاماسیندان سونگ ایندی بۇلسا تۆرکمنیستان ایلچیحاناسی، تۆرک‌سۇی قوراماسی و آنکارا بیلیم‌یوردی تاراپیندان آنکارادا ماغتیم‌قولی حضرتلری‌نینگ آدینا اولی بیر کنفرانس گچیرلر.
دابارا آنکارانینگ دیکمِن پارکینداقی ماغتیم‌قولی پیراغی‌نینگ هیکلینه گۆل قۇیولوپ باشلانار. آننا گۆنی ۲۹ اردیبهشت (۱۸-نجی می آیی) تۆرکیه‌دأکی تۆرکمنلر و تۆرک دۆنیأسی‌نینگ عالیملاری ارتیر بیلن ساغات ۹:۳۰-دا تۆرکمنیستان پارکینداقی حضرت ماغتیم‌قولی پیراغی‌نینگ هیکلینه گۆل قۇیوپ تۆرکمن شاهیرینی سیلار.
دوشنبه گۆنی خرداد آیی‌نینگ بیرینجی گۆنۆنده (مِی آیی‌نینگ ۲۱-ینده)بۇلسا آنکارا بیلیم‌یوردونینگ دیل، تاریح و جغرافیا فاکولته‌سی‌نینگ فارابی سالُنیندا ماغتیم‌قولی پیراغا دگیشلی کنفرانسا باشلانار.
کنفرانسینگ آچیلیش داباراسیندا تۆرک لهچه‌لری و ادبیاتی بؤلۆمی‌نینگ باشلیغی پروفسور دکتر سماء اؤزاؤندر باروتچی، دیل، تاریح و جغرافیا فاکولته‌سی‌نینگ باشلیغی پروفسور دکتر رحمی أر، آنکارا بیلیم‌یوردونینگ باشلیغی پروفسور دکتر جمال تالوغ، تۆرک‌سوی‌یینگ باشلیغی دوسن کاسینوف، تۆرکمنیستان‌ینگ عاداتدان داشاری دۇلی ایغتیارلی ایلچیسی ماقصات دؤولت صَحِدوف و تۆرکیأنینگ مدنیت و سیاحاتچیلیق وزیری أرطوغرول گۆنای چیقیش ادر.
میهمانلارینگ چیقیشیندان سۇنگ ماغتیم‌قولی پیراغی بارادا فیلم گؤرکزیلِر و اؤیله‌دن سۇنگ کنفرانسینگ ایکی اوُتورشیغی بولار.
کنفرانسینگ بیرینجی اۇتورشیغی: اولی تۆرکمن عاقیلداری ماغتیم‌قولی پیراغی
اۇتورشیغینگ باشلیغی: آنکارا بیلیم یوردوندان پروفسور دکتر سماء اؤز اؤندِر باروتچی
اۇتورشیقدا شو ماقالالار اۇقالار:
ماغتیم‌قولی پیراغی تۆرکمن حالقی‌نینگ میللی بویسانجی- پروفسور دکتر آنناقوربان عاشیروف (تۆرکمنیستان‌ینگ میللی قۇل‌یازمالار انستیتوتی‌نینگ باشلیغی)
تۆرک حالق شیغری‌نینگ اینگ اولی وکیلی ماغتیم‌قولی پیراغی- پروفسور دکتر رامیز عسگر (باکو دؤولت بیلیم‌یوردوندان
ماغتیم‌قولی و قازاق شیغیرلاری- پروفسور دکتر تمیرحان تِبـِگنوف (آلماتی آبای میللی عیلیم انستیتوتیندان)
ماغتیم‌قولی‌نینگ قۇشغی دۆنیأسی‌نینگ ماغنی تاراپی- پروفسور دکتر مِلِک أردِم (آنکارا بیلیم‌یوردوندان)
کنفرانسینگ ایکینجی اۇتورشیغی: دؤولت مأمِد آزادی
اۇتورشیغینگ باشلیغی: تۆرکمنیستان‌دان پروفسور دکتر آنناقوربان عاشیروف
ایکینجی اۇتورشیقدا شو ماقالالار اۇقالار:
ماغتیم‌قولی گۆنلرینده دؤولت مأمِد آزادینی یاتلامانینگ أهمیتی- دکتر سِلجان ساغلیق (آنکارا بیلیم‌یوردوندان)
ماغتیم‌قولی پیراغی‌نینگ یانیندا زنان و ماشغالا مسئله‌سی- دکتر نورجان اؤزنال گۆدِر (ایستامبول بیلیم‌یوردوندان)
ماغتیم‌قولی‌نینگ دیل و دیل بیلیمی باراداقی قاراییشی‌نینگ قۇشغیلارینداقی ایزلاری- دکتر بردی ساری‌یف (آنکارا بیلیم‌یوردوندان)
ماغتیم‌قولی دیوانیندا سس بیلیمی حصوصیتی- دکتر حیاتی ییلماز (موغلا بیلیم‌یوردوندان)
ماغتیم‌قولی‌نینگ تۆرکمن‌صحراداقی میراثی- شهروز آق‌آتابای (آنکارا بیلیم‌یوردونینگ طالیبی)
ماقالالاردان سۇنگ تۆرکمنیستان‌ینگ حالق تانسلاری تۇپاری اؤز تانسلاری بیلن کنفرانسا قاتناشانلاری جۇشدیرار.
کنفرانسینگ آدرسی: آنکارا بیلیم‌یوردونینگ دیل، تاریح و جغرافیا فاکولته‌سی- فارابی سالونی- صحّیه میدانی- آنکارا
منبع: ت.ر.ت تورکمنچه
وبلاگ رسمی بنیادمختومقلی فراغی